प्रतिनिधिसभा अन्तर्गतको राज्यव्यवस्था तथा सुशासन समितिको कामकाज प्रभावित भएको हो । एउटै समितिबाट सभापति सहित ६ जना सदस्य मन्त्री बनेपछि समितिको बैठक अघि नबढेको हो । समितिमा कुनै पनि विचाराधीन विधेयक नभएपनि समितिले आफ्नो कार्य क्षेत्रभित्र पर्ने सरोकारका विषयमा छलफल अघि बढाउन सकेको छैन । यो समिति अन्तर्गत प्रधानमन्त्री तथा मन्त्रिपरिषद्को कार्यालय, गृहमन्त्रालय, रक्षा मन्त्रालय, संघीय मामिला तथा सामान्य प्रशासन मन्त्रालय, अख्तियार दुरूपयोग अनुसन्धान आयोग, लोकसेवा आयोग र निर्वाचन आयोग एवम् शान्ति प्रक्रिया लगायतका विषय कार्यक्षेत्र पर्छन् । समितिकी सचिव बबिता मिश्रले २०७४ सालदेखि १४ वटा विधेयक आएकोमा सबै विधेयक समितिबाट पास भएर प्रतिनिधिसभामा पेश भइसकेपनि सभापति नभएका कारण समितिको नियमित बैठक बस्न नसकेको बताइन् । २६ जना सदस्य रहेको सो समितिमा अहिले २० सदस्य मात्र रहेका छन् । समितिकी सभापति शशी श्रेष्ठ भूमी व्यवस्था तथा सहकारी मन्त्री भएकी छिन् भने अन्य सदस्यहरु दिलेन्द्रप्रसाद बडु कानुन न्याय तथा संसदीय मामिला मन्त्री, देवेन्द्र पौडेल शिक्षा, विज्ञान तथा प्रविधि मन्त्री, महेश्वरजंग गहतराज यूवा तथा खेलकुद मन्त्री, जनार्दन शर्मा अर्थ मन्त्री, पम्फा भुसाल उर्जा, जलस्रोत तथा सिञ्चाई मन्त्री बनेका छन् । एकैपटक ६ जना सदस्य मन्त्री बनेपछि समितिमा कोरम नपुग्ने हो कि भन्ने अर्को चिन्ता रहेको समिति सचिव वविता मिश्रले बताइन् । उनले भनिन– ‘कोरम नपुगी बैठक बस्नुको पनि अर्थ रहँदैन । कोरम नपुगेको बैठकबाट कुनै निर्णय हुन सक्दैन ।’प्रतिनिधिसभा नियमावलीमा समितिमा सभापति नभएका बेला जेष्ठ सदस्यले अध्यक्षता गरेर समितिको बैठक चलाउन सकिने व्यवस्था छ । प्रतिनिधिसभा नियमावली २०७५ को दफा १ सय ७३ को उपदफा १०, ११ र १२ मा समितिमा सभापति नभएका बेला समितिको जेष्ठ सदस्यले अध्यक्षता गर्ने र समितिको सभापतिलाई निर्वाचित भएको सदस्यले सपथ खुवाउने व्यवस्था रहेको छ । उपदफा १० मा भनिएको छ– ‘समितिको सभापति नभएको वा नरहेको अवस्थामा उपस्थित सदस्यमध्ये ज्येष्ठ सदस्यले समितिको बैठकको सभापतित्व गर्नेछ ।’ उपदफा ११ मा भनिएको छ– ‘ज्येष्ठ सदस्य सभापति पदको निमित्त प्रस्तावित भएमा त्यसपछिको उपस्थित ज्येष्ठ सदस्यले समितिको बैठकको सभापतित्व गर्नेछ ।’ उपदफा १२ मा समितिको सभापति पदमा निर्वाचित सदस्यले सभामुख समक्ष अनुसूची–४ बमोजिम पद तथा गोपनीयताको शपथ ग्रहण गर्नुपर्नेछ भन्ने व्यवस्था रहेको छ ।

सम्बन्धित खवर
Latest Posts from खोज खुलासा

Leave a Reply

Your email address will not be published. Required fields are marked *